नमाज पठणावर बंदीची मागणी, नांदेडमध्ये राडा

 

नांदेड : विद्यार्थिनींनी शाळेत हिजाब परिधान करण्यावरुन गेल्या महिन्यात देशभरात वादंग उठला. हिजाबच्या समर्थनार्थ राज्या-राज्यात मुस्लिम संघटनांचे मोर्चे निघाले तर हिजाब हटाव म्हणत काही हिंदू संघटनांनी देखील मोर्चे काढले. तो विषय मिटत नाही तोच आता नांदेडमध्ये नव्या विषयाला तोंड फुटलंय. नांदेड विद्यापीठातील अभ्यासिकेत नमाज पठनावर बंदी घालावी अशी मागणी करत मनसे कार्यकर्त्यांनी आज निदर्शने केली.

विद्यापीठातील अभ्यासिकेत नमाज पठनावर बंदी घालावी अशी मागणी मनसे कार्यकर्त्यांनी केली. ही मागणी करताना मनसैनिकांनी मोठी निदर्शनेही केली. मनसे कार्यकर्त्यांनी या संदर्भात कुलगुरुंना निवेदन देऊन अभ्यासिकेत होत असलेल्या नमाजावर आक्षेप घेतलाय.

नमाज पठणामुळे इतर विद्यार्थ्यांना त्रास होत असल्याचा आरोप मनसेने केलाय. हा प्रकार तातडीने थांबवा अन्यथा मनसे स्टाईलने आंदोलन छेडण्याचा इशारा मनसैनिकांनी दिलाय तर याप्रकरणी लक्ष घालून योग्य ती पावलं उचलण्याचं आश्वासन कुलगुरुंनी दिलंय.

मनसेचं म्हणणं काय?

"नांदेड विद्यापीठात सर्व जातीधर्माचे विद्यार्थी शिक्षण घेत आहेत. विद्यापीठाच्या अभ्यासिकेत काही मुस्लिम विद्यार्थी नमाज पठण करत असल्याचं दिसून आलं आहे. मुस्लिम विद्यार्थ्यांना नमाज पठणाला विद्यापीठाने परवानगी दिली आहे का?"

जर नमाज पठणाला मुस्लिम विद्यार्थ्यांना परवानगी दिली असेल तर हिंदू विद्यार्थ्यांना देखील पुजा आरती करण्यास परवानगी देण्यात यावी. आपल्या विद्यापीठातील अभ्यासिकेत मुस्लिम विद्यार्थी नमाज पठण करत असल्याने इतर विद्यार्थ्यांना त्याचा त्रास होतोय, त्यांच्या अभ्यासावर परिणाम होतोय. तसंच अभ्यासिकेवर देखील परिणाम होतोय. विद्यार्थ्यांमध्ये धार्मिक आणि जातीय तेढ निर्माण होत असल्याने आपण संबंधित नमाज पठण करत असलेल्या विद्यार्थ्यांवर त्वरित बंदी घालावी"

"शाळा कॉलेज हे विद्येचं मंदिर असते. तेथे कोणत्याही जाती किंवा धर्माचा भेदभाव नसतो. शाळा सर्मधर्म समभावाचे ठिकाण असते. आमच्या मागणीचा गांभीर्यपूर्वक विचार करावा नाहीतर मनसे स्टाईल आंदोलन छेडण्यात येईल", असा इशारा मनसेने दिला आहे.