भाडोत्री सैन्य हा काय प्रकार? असंच जर असेल तर भाडोत्री राज्यकर्ते आणा, मुख्यमंत्र्यांचा हल्लाबोल

मुंबई : "भाडोत्री सैन्य हा काय प्रकार? असंच जर असेल तर भाडोत्री राज्यकर्ते आणू, टेंडर काढा. नाहीतरी राजकर्ते ५ वर्षांसाठी भाडोत्रीच असतात. एक्स्टेंशनसाठी पुन्हा जनतेत जाऊन मतं मागावीच लागतात. पण भाडोत्री सैन्य आणू पाहणाऱ्या सरकारला माझा सवाल आहे, की पोरांची उमेदीची वर्षे हातातून गेल्यानंतर त्यांनी पुढे काय करायचं? त्यांच्यासाठी तुम्ही काय करणार आहात?", अशा शब्दात अग्निपथ योजनेवरुन मुख्यमंत्री उद्धव ठाकरे यांनी केंद्र सरकारवर हल्लाबोल केला. "हृदयात राम आणि हाताला काम अशी शिवसेनेच्या हिंदुत्वाची व्याख्या आहे, माथी भडकावणारं शिवसेनेचं हिंदुत्व नाही", असंही मुख्यमंत्र्यांनी ठणकावून सांगितलं.

शिवसेनेच्या ५६ व्या वर्धापन दिनानिमित्त शिवसेना पक्षप्रमुख तथा मुख्यमंत्री उध्दव बाळासाहेब ठाकरे यांनी शिवसैनिक, पदाधिकारी आणि लोकप्रतिनिधींना संबोधित केलं. शिवसेनेच्या जन्माचा इतिहास, बाळासाहेबांच्या कडू-गोड आठवणी, केंद्र सरकारची अग्निपथ योजना, राज्यसभा निवडणूक-विधान परिषद निवडणूक, अशा मुद्द्यांवर भाष्य करत पहिल्या फळीतील सेना नेत्यांबद्दल मुख्यमंत्र्यांनी गौरवोद्गार काढले.

"अग्निपथमुळे तरुण रस्त्यावर आलेत. या तरुणांची माथी कुणी भडकवली, हृदयात राम आणि हाताला काम हे आपलं हिंदुत्व आहे. तेच चित्र आज देशात आहे. काम नसेल तर काहीही उपयोग नाही. ऐन उमेदीच्या वयात पोरांना मृगजळ दाखवणार, त्यानंतर पोरांच्या हाताला काय लागणार? तरुणांवर ही वेळ का आणि कुणामुळे आली? अचानक योजना आणायची, अग्नीवीर नाव द्यायचं पण शिकवणार काय? चार वर्षाने यांच्या नोकरीचा पत्ता नाही. शिवाजीराव देशमुखांच्या भाषणात ते म्हणायचे शिवाजी महाराजांनी स्वराज्याची शपथ १६ व्या वर्षी घेतली. ज्ञानेश्वरांनी ज्ञानेश्वरी १६ व्या वर्षी लिहिली. पण आता उमेदीच्या वयात पोरांना काहीतरी मृगजळ दाखवणार नंतर फक्त १०% लोकांना घेणार. भाडोत्री सैन्य आणायची कल्पना करताय तर मग काढा टेंडर. भाडोत्री राज्यकर्तेही आणू", अशा शब्दात मुख्यमंत्र्यांनी केंद्र सरकारवर हल्लाबोल केला.

"तुम्ही मग सगळंच वापरा आणि फेका. मग ही लोकं भडकणार नाही तर काय. तुम्हाला मत दिलं ते नुसत मत नाही एक धोरण असायला हवे. उद्याची निवडणूकीत आमच्यात फुट पडू शकत नाही हे उद्या देशाला दाखवायचे आहे. महाराष्ट्रात तुमचा सत्तेचा माज चालणार नाही. प्रत्येकाला पर्याय असतोच, शेराला सव्वा शेर येणार आताचे राजकारण पाव शेराचे", असंही मुख्यमंत्र्यांनी ठणकावून सांगितलं.