त्याच्या मनात होता संशय, अन् थेट पेटवलं बायकोला

 

त्याच्या मनात होता संशय, अन् थेट पेटवलं बायकोला

लातूर : लातूरमध्ये पतीने पत्नीला पेटवून दिल्याची धक्कादायक घटना  घडली आहे. पोलिसांनी या प्रकरणी गुन्हा दाखल केला आहे. सात वर्षांपूर्वी त्यांचं लग्न झालं होतं. त्यांना दोन लहान मुलीही आहेत. आता चारित्र्यावरील संशयाने अर्चाना टिंगरेचा घात केला. जळालेल्या अर्चनावर स्वर्गीय विलासराव देशमुख वैद्यकीय शासकीय रुग्णालयात उपचार उपचार सुरू आहेत. पोलिसांनी आरोपी पतीला ताब्यात घेतलं आहे.

अर्चना जीवन मरणाच्या उंबरठ्यावर आहे. पतीने आपल्याला जीवे मारण्याचा प्रयत्न केला, असा आरोप अर्चनाने केला आहे. अर्चनाच्या तक्रारीवरून तिचा पती प्रविण टिंगरे याच्यावर एमआयडीसी पोलीस ठाण्यात गुन्हा दाखल करण्यात आला आहे. आज सकाळी ही घटना घडली.

सुखी संसाराची स्वप्न घेऊन सात वर्षांपूर्वी अर्चना प्रविण टिंगरे सोबत लग्न होऊन लातूर शहरातील चौधरी नगरमध्ये आली. प्रविण वाहन चालक आहे. त्याच्या तुटपुंज्या पगारावर घर खर्च भगत नसे. तरीही अर्चनानं मोठ्या नेटानं प्रविणचा संसार फुलविण्याचा प्रयत्न केला. संसाराच्या वेलीवर दोन मुली फुलल्या. मात्र प्रविण दिवसेंदिवस अर्चनावर संशय घेऊ लागला. संशयावरून तो सतत अर्चनाला मारहाण करू लागला.

संशयाचं भूत प्रवीणच्या डोक्यात असं काही शिरलं की गॅसवर अंघोळीसाठी पणी ठेवत असलेल्या अर्चनावर त्याने थेट रॉकेल ओतल. अन् गॅसवर ढकललं. क्षणाचाही विलंब न होता अर्चना पेटली. तिने प्रतिकार करायच्या आत हे सगळं इतक्या गतीने घडलं की तिलाही विश्वास बसत नाही, आपल्यासोबत आपल्या नवऱ्याने असं काही केलं. पण संशयाचं भूत विवेक घालवतो. गंभीर जखमी झालेल्या अर्चनाला वाचविण्यात कदाचित डॉक्टरांना यश येईलही. मात्र, या संशयाने दोघांच्या संसाराची होळी केली हे मात्र नक्की.