सराफा व्यापाऱ्यांच्या विश्वासाला चुना

सराफा व्यापाऱ्यांच्या विश्वासाला चुना

 लातूरः आठ वर्षांपासून लातूर शहरातील सराफा व्यापाऱ्यांचा विश्वास जिंकणाऱ्या पश्चिम बंगालच्या एका कारागिराने सराफा व्यापाऱ्यांच्या या विश्वासाला चुना लावत सात सराफा व्यापाऱ्यांचे ७६ लाख २६ हजार ४४४ रुपयांचे दागिने घेऊन फरार झाल्याची घटना लातुरात घडली आहे. त्यामुळे सराफा व्यापाऱ्यांमध्ये एकच खळबळ उडाली. या प्रकरणी सराफा व्यापाऱ्यांनी दिलेल्या तक्रारीवरून गांधी चौक पोलीस ठाण्यात फरार कारागिराविरुद्ध गुन्हा दाखल करण्यात आला आहे.

विनोद सुधीर जाना असे या कारागिराचे नाव असून तो पश्चिम बंगालमधील रहिवासी आहे. आठ वर्षापासून तो लातूर शहरातील सराफा लाईन येथील व्यापाऱ्यांकडून सोन्या चांदीच्या दागिन्यांना कडी कोंडा बसवून देणे दागिने तयार करण्याचे काम तो करत होता. त्यासाठी त्याने सराफा बाजारात दुकानही टाकले होते. गेल्या आठ वर्षांपासून इमाने इतवारी कारागिरी केल्यामुळे येथील व्यापाऱ्यांनी त्याच्यावर मोठा विश्वास ठेवला होता त्यामुळेच ते सोन्या चांदीचे दागिने कारागिरीसाठी त्याच्याकडे देत होते.

दरम्यान, ३ ऑक्टोबर २०२२ रोजी या कारागीराने विकास माधवराव चामे यांनी २५० ग्रॅम वजनाचे सोन्याचे लॉकेट, मंगळसूत्र असे १३ लाख १२ हजार रुपयांचे दागिने दिले होते. तर विश्व ज्वेलर्सचे मालक प्रताप विश्वनाथराव जाधव किनीकर यांनी या कारागिराकडे २५० ग्रॅम वजनाचे सोन्याचे बिस्किट आणि ४० ग्रॅम ३७० मिली सोन्याची चेन गंठण बनविण्यासाठी दिले होते. न्यू गणेश ज्वेलर्सचे मालक व्यंकट दिनकर मोगरगे यांनी १५ लाख ६० हजार रुपये किमतीचे ३०० ग्रॅम वजनाचे सोने राणीहार आणि पट्टी गंठण बनविण्यासाठी दिले होते. श्री योगेश्वरी अलंकार सराफ लाईन लातूरचे मालक अमोल अरुणराव दैठणकर यांनी ८३ ग्रॅम ३०० मिली वजनाचे सोन्याचे दोन ब्रासलेट व एक लॉकेट असे एकूण ४ लाख ३५ हजार रुपयांच्या दागिन्यांना कडी कोंडे बसविण्यासाठी त्याच्याकडे दिले होते.

विजय रिफायनरीचे मालक अजय तुकाराम चिंचणकर यांनी ५ लाख २० हजार रुपये किमतीचे १००० ग्रॅम वजनाचे सोने राणीहर व रस्सी चेन बनविण्यासाठी दिले होते. तर दयानंद दामोदर काळे यांनी त्यांच्याकडील १० लाख ४० हजार रुपये किमतीचे २०० ग्रॅम वजनाचे सोने रसी लॉकेट बनविण्यासाठी दिले होते. तसेच सचिन ज्वेलर्सचे मालक सचिन अनंतराव पोतदार यांनी त्यांच्याकडील ४ लाख ९५ हजार रुपयांचे ९५ ग्रॅम सोने गंठण व लॉकेट करण्यासाठी दिले होते.

दागिने तयार झाले का याची विचारणा करण्यासाठी या व्यापाऱ्यांनी बिनोद जानाला फोन केला. मात्र त्याचा फोन बंद आला. त्यामुळे त्याच्या दुकानी जावून पाहणी केली परंतु त्याचे दुकान बंद दिसून आले. त्यामुळे त्याच्या भावाला फोन करून चौकशी केली. त्यावेळी दुकानातील कामगाराच्या आईच्या अंत्यविधीला तो गावाकडे गेल्याचे सांगण्यात आले. मात्र यात काहीतरी गडबड असल्याचा संशय व्यापाऱ्यांना आल्याने त्यांनी कोणत्या कामगाराच्या आईचे निधन झाले याची चौकशी केली. मात्र कोणाच्याही आईचे निधन झाले नसल्याचे समजले. त्यामुळे आपला विश्वासघात झाल्याचे व्यापाऱ्यांच्या लक्षात येताच विकास माधवराव चामे यांनी गांधी चौक पोलिस ठाण्यात तक्रार दाखल केली. ७६ लाख २६ हजार ४४४ रुपये किमतीचे सोने घेऊन विश्वासघात केल्या प्रकरणी बिनोद सुधीर जाना याच्या विरोधात गुन्हा दाखल करण्यात आला आहे.