'महाराष्ट्र बंद'चा वाहतूकीवर परिणाम; बेस्टची तोडफोड, पीएमपी, टीएमटी बंद

 मुंबईः लखीमपूर खिरी येथील घटनेच्या निषेधार्थ महाविकास आघाडीने आज, सोमवारी ‘महाराष्ट्र बंद’ची हाक दिली आहे. संपूर्ण महाराष्ट्रात या बंदला सकाळपासून संमिश्र प्रतिसाद मिळत आहे. महाराष्ट्र बंदचा परिणाम मोठ्या प्रमाणात वाहतूकीवर परिणाम होत आहे. मुंबईत बेस्ट, पुण्यातील पीएमपी व ठाण्यातील टीएमटी बस सेवांना या बंदचा फटका बसला आहे. .

उत्तर प्रदेशातील लखीमपूर खिरी येथे शेतकऱ्यांना चिरडण्याचा प्रयत्न करण्यात आला. या घटनेच्या निषेधार्थ राज्यभरातील विविध संघटनांनी पाठिंबा दर्शवला आहे. तसंच, शिवसेना प्रणित बेस्ट कामगार सेनेनं बंदला पाठिंबा दिल्यामुळं अनेक बस पहाटेपासून आगारातच आहे. त्यामुळं अनेक नोकरदारांना ऑफिस गाठण्यासाठी रिक्षा व टॅक्सीचा पर्याय शोधावा लागला.

तसंच, बंद सुरू झाल्यानंतर काल मध्यरात्रीपासून ते पहाटे दरम्यान बेस्ट बसच्या नऊ गाड्यांवर दगडफेक करण्यात आल्याची घटना घडली आहे. बेस्ट बसच्या आठ गाड्या व भाडे तत्वावरील एका बसगाडीची तोडफोड करण्यात आली आहे. धारावी, मानखुर्द, शिवाजी नगर, चारकोप, ओशिवरा, देवनार, इनॉर्बिट मॉल अशा विविध भागात या तोडफोडीच्या घटना घडल्या आहेत. त्यामुळं बेस्ट व्यवस्थापनाने पोलीस संरक्षण मागवले असून जोपर्यंत संरक्षण मिळणार नाही तोपर्यंत गाड्या आगारातून बाहेर पडणार नाही, असा पवित्रा बेस्ट कर्मचाऱ्यांनी घेतला आहे. त्यामुळं आज मुंबईच्या रस्त्यावर तुरळक बेस्ट धावत आहेत.
तसंच, महाराष्ट्र बंदच्या पार्श्वभूमीवर ठाणे महानगरपालिकेची (टीएमटी) एकही बस आगारातून बाहेर पडली नाही. टीएमटीची वाहतूक बंद असल्यानं रिक्षासाठी प्रवासांच्या मोठ्या रांगा लागल्या आहेत. तर, रिक्षाचालकही प्रवाशांकडून अधिक भाडे घेत असल्याची तक्रार नागरिकांनी केली आहे.


पीएमपीची सेवा बंद

महाराष्ट्र बंदमुळे पुणे महानगर परिवहन महामंडळा’ची बससेवा बंद ठेवणार आली आहे. त्यामुळं प्रवाशांची मोठी गैरसौय होत आहे. रिक्षा पंचायतीसह पुणे शहर जिल्हा वाहतूक सेवा संघटना, आम आदमी रिक्षा संघटनाही बंदमध्ये सहभागी असेल.

'पोलीसच दुकानं बंद करायला सांगताहेत, ही कुठली पद्धत? 

हे कुठलं राज्य?'

लोकल सुरू, मात्र गर्दी कमी

मुंबई लोकल सुरळीत सुरू असली तरी रेल्वे स्थानकांवर नेहमीप्रमाणे वर्दळ दिसून येत नाही. सकाळच्या सुमारास ऑफिसला निघणाऱ्या प्रवाशांची मोठी गर्दी असते मात्र, आज सकाळपासूनच मुंबईतील महत्त्वाच्या रेल्वे स्थानकांवर तुरळक गर्दी होती.

दरम्यान, मुंबईत एसटी, रिक्षा, टॅक्सी सेवा सुरळीत सुरू आहेत. मुंबईतून सुटणाऱ्या सर्व एसटी गाड्या चालू असून बाहेरून येणाऱ्या गाड्या आलेल्या नसल्याने वाहतूक मंदावली आहे