निवडणुकांच्या प्रचाराचा धुरळा उडणार! करोनाची तिसरी लाट ओसरतेय? नवीन रुग्णसंख्येत लक्षणीय घट, पण...

 नवी दिल्ली : देशात करोनाची तिसरी लाट ( third wave in india ) सुरू आहे. पण ही लाट ओसरत ( coronavirus india ) आहे का? असा प्रश्न उपस्थित होत आहे. दुसरीकडे, करोना मृत्युंची संख्याही ९५९ वर पोहोचली आहे. यामुळे चिंता कायम असल्याचं दिसतंय. केंद्रीय आरोग्य मंत्रालयाने गेल्या २४ तासांतील करोनाच्या स्थितीची ( new covid cases ) आकडेवारी जारी केली. तिसऱ्या लाटेत प्रथमच आठवड्याच्या एकूण रुग्णांच्या संख्येत घट दिसून येत आहे. २४ ते ३० जानेवारीदरम्यान १७.५ लाख रुग्णांची नोंद झाली. ही संख्या गेल्या आठवड्याच्या तुलनेत १९ टक्क्यांनी कमी आहे.

गेल्या २४ तासांत देशात २ लाख ९ हजार ९१८ नवीन रुग्ण आढळून आले आहेत. देशात गेल्या काही दिवसांपूर्वी करोनाच्या नवीन रुग्णांची संख्या ही साडेतीन लाखाच्या वर गेली होती. आता ती कमी होत. २ लाखापर्यंत आली आहे. पण करोना संसर्गाने होणारे मृत्यू वाढले असून ही संख्या ९०० वर गेली आहे. देशात गेल्या २४ तासांत ९५९ रुग्णांचा करोनाने मृत्यू झाला आहे. दिलासादायक बाबा म्हणजे २ लाख ६२ हजार ६२८ जण करोनातून बरे झाले आहेत.

देशातील करोनाच्या अॅक्टिव्ह रुग्णांची संख्या ही १८ लाख ३१ हजार २६८ इतकी झाली आहे. देशातील अॅक्टिव्ह रुग्णांची संख्या काही दिवसांपूर्वी २१ लाखांवर गेली होती. ती आता कमी झाली आहे. दुसरीकडे करोना संसर्गाचा पॉझिटिव्ही दर कमी होऊन तो १५.७७ टक्क्यांवर आला आहे. हा १७ टक्क्यांवर गेला होता.

निवडणूक आयोगाची आज महत्त्वाची बैठक

दरम्यान, केंद्रीय निवडणूक आयोगाची ( election commission of india ) आज महत्त्वाची बैठक होत आहे. मुख्य निवडणूक आयुक्त सुशील चंद्रा यांच्या अध्यक्षतेखाली ही बैठक होत आहे. देशातील करोनाच्या स्थितीची खास करून निवडणूक होत असलेल्या राज्यांमधील करोनाच्या स्थितीचा ते आढावा घेणार आहे. केंद्रीय आरोग्य मंत्रालयाच्या सचिवांसोबत त्यांची बैठक होत आहे. याशिवाय निवडणूक होत असलेल्या ५ राज्यांचे आरोग्य सचिव आणि मुख्य सचिवांसोबतही निवडणूक आयोगाची बैठक होणार आहे. या बैठकीनंतर निवडणूक आयोग विधानसभा निवडणूक होत असलेल्या राज्यांमध्ये जाहीर प्रचारसभा आणि रोड शोवर घातेली बंदी ( physical rallies and roadshows ) उठवायची की नाही? याचा आढावा घेतला जाईल. त्यानंतर निवडणूक आयोग निर्णय घेईल, असं बोललं जातंय.