बीडच्या कायदा-सुव्यवस्थेवर विशेष बैठक बोलवा, पंकजांचं गृहमंत्र्यांना पत्र

बीड : बीड जिल्हयात कायदा आणि सुव्यवस्था पूर्णतः ढासळली असून पोलिसांचा गुन्हेगारांवर कसलाही धाक राहिला नाही. चोऱ्या, खून, मारामाऱ्या, महिलांवर अत्याचार अशा घटना दिवसेंदिवस वाढतच आहेत. या घटनांमुळे सर्व सामान्य नागरिकांत भीती निर्माण झाली असून याची गंभीर दखल घेतली गेली पाहिजे. त्यासाठी फक्त बीडच्या कायदा सुव्यवस्थेसंबंधी विशेष बैठक बोलवावी, अशी मागणी भाजप नेत्या पंकजा मुंडे (Pankaja Munde) यांनी गृहमंत्री, गृह राज्यमंत्री आणि विशेष पोलिस महानिरीक्षक यांना पत्र पाठवून केली आहे.

गेल्या काही महिन्यांपासून जिल्ह्यातील कायदा-सुव्यवस्थेचा प्रश्न ऐरणीवर आला आहे. गुन्हेगारी स्वरुपाच्या घटना जिल्ह्यात मोठया प्रमाणात वाढल्या आहेत. चोऱ्या, खून, मारामाऱ्या, महिलांवरील अत्याचार, खंडणी वसुली, तलवारी, रिव्हॉल्व्हर अशा घातक शस्त्रास्त्रांचा वापर सर्रास होताना दिसून येत आहेत. बीड, परळी, अंबेजोगाई, माजलगांव, गेवराई सह सर्वच तालुक्यात गुन्हेगारांनी हैदोस मांडला आहे. पोलिसांचा कसलाही धाक अथवा नियंत्रण राहिलेलं नाही. जिल्ह्यात पोलिस यंत्रणा आहे की नाही असा प्रश्न सर्व सामान्यांना पडला आहे, असं पंकजा मुंडे यांनी गृहमंत्र्यांना लिहिलेल्या पत्रात म्हटलं आहे.

गुन्हेगारीच्या वाढत्या घटना जिल्ह्यापुढची अतिशय चिंताजनक बाब बनली आहेत. अशा घटना गंभीरतेने घेण्याची गरज निर्माण झाली आहे. केवळ बीडच्या कायदा-सुव्यवस्था विषयावर स्वतंत्र विशेष बैठक घेऊन गुन्हेगारांच्या विरोधात कठोर पावले उचलावीत आणि परिस्थिती नियंत्रणात आणून सर्व सामान्य नागरिकांच्या मनातील भीती दूर करावी, अशी मागणी पंकजा मुंडे यांनी पत्राद्वारे केली आहे.